Aktori me origjinë shqiptare, Kostas Nikouli, vazhdon të jetë një figurë e spikatur në skenën artistike greke. Ai u bë i njohur që herët në karrierën e tij me rolin kryesor në filmin “Xenia” të regjisorit Panos H. Koutras, një interpretim që u vlerësua me çmimin për Debutimin më të Mirë në Festivalin Ndërkombëtar të Filmit në Athinë.
Edhe pse ka lindur në Athinë, Nikouli ka rrënjë nga Saranda, një fakt që, siç thotë vetë, nuk e ka fshehur asnjëherë.
Në një intervistë, ai rrëfen se për shkak të ligjeve të shtetësisë në Greqi, mori shtetësinë e prindërve dhe për vite me radhë iu desh të përballej me procedura të shpeshta rinovimi të dokumenteve, një realitet që ndikoi edhe gjatë viteve të shkollës.
Megjithatë, ai e ka përqafuar gjithmonë identitetin e tij dhe nuk ka hezituar ta shprehë hapur, edhe në momente të vështira si bullizimi në moshë të vogël. Sipas tij, konfliktet mes fëmijëve janë të zakonshme dhe jo domosdoshmërisht lidhen me origjinën.
Nikouli kujton se fliste shpesh me krenari për Shqipërinë, për verat e kaluara në Sarandë dhe për miqtë që kishte atje.
“Kam lindur në Athinë, por në Greqi nuk funksionon ende parimi që një fëmijë merr automatikisht shtetësinë e vendit ku lind. Unë mora shtetësinë e prindërve të mi dhe çdo gjashtë muaj duhej të rinovonim vizat.
Në shkollë, fëmijët gjejnë arsye nga më të ndryshmet për t’u zënë. Edhe ne kishim përplasje, por unë nuk u fsheha kurrë. Mund të thosha që jam grek, por gjithmonë thoja se jam nga Saranda, nga Shqipëria.
Flisja për pushimet e mia, për plazhet, për gjithçka që përjetoja atje. Ka pasur raste që më quanin të dobët, por kjo s’kishte lidhje me faktin që isha i huaj.
Unë ndihesha krenar për jetën time atje, për njerëzit dhe miqtë e mi. Kur e ndan këtë krenari me të tjerët, ata nuk kanë më çfarë të të thonë,” u shpreh aktori.
